ஆந்திர மாநிலத்திலேயே ஒன்றுபட்ட ஆந்திராவை விரும்பும் மக்களின் போராட்டங்களையும் மீறி, பாராளுமன்றத்தின் இரு அவைகளிலும் கிளம்பிய பலத்த எதிர்ப்புகளையும் மீறி ஆந்திர மாநிலத்தை காங்கிரஸ் கட்சியின் தலைமையிலான மத்திய அரசு ஐதராபாத்தை பொதுத்தலைநகராகக் கொண்ட தெலங்கானா மற்றும் சீமாந்திரா என இரு மாநிலங்களை சட்டமசோதா நிறைவேற்றியதன் மூலம் உருவாக்கிவிட்டது. இந்த மசோதாவை நிறைவேற்றுவதற்கு காட்டிய உற்சாகமும், வேகமும் வேறு எந்த மசோதாவிற்கும் காங்கிரஸ் கட்சி காட்டியது இல்லை. இதே உற்சாகத்தையும், வேகத்தையும் ''மகளீர் இடஒதுக்கீடு மசோதாவிலும்'' காட்டியிருந்தால், இந்நேரம் மகளீருக்கு ஆட்சி அதிகாரத்தில் 33% இடஒதுக்கீடு கிடைத்திருக்கும் என்ற ஆதங்கம் இந்த நாட்டிலுள்ள மகளீருக்கும், முற்போக்காளர்களுக்கும் உண்டு என்பதை நாடறியும்.
மக்களின் அதிருப்தியில் பலகீனமாக போய்விட்ட காங்கிரஸ் கட்சி எப்படியாவது வருகிற நாடாளுமன்றத் தேர்தலில் வெற்றிப்பெற்றாகவேண்டும் என்கிற நப்பாசையிலும், தெலங்கானா மாநிலம் என்ற பஞ்சு மிட்டாயை காட்டி தெலங்கானா ராஷ்ட்ரிய சமிதியை தங்களுடன் இணைத்துக்கொள்ளலாம் என்ற பேராசையிலும் நாக்கைத் தொங்கப்போட்டுக்கொண்டு காங்கிரஸ் கட்சியோ தேர்தலுக்கு முந்தைய கடைசி நாடாளுமன்றக் கூட்டத்தொடரில் இப்படியெல்லாம் படுவேகமாக கைகளை நகர்த்தி தெலங்கானா மாநிலத்தை உருவாக்கி கே.சி.ஆரிடம் கொடுத்துவிட்டது. சந்திரசேகர் ராவும் சுதந்திரப்போராட்டத்தில் வெற்றிபெற்றது போல் வெற்றிக்களிப்பில் மிதந்தார். பிரிவினையை விரும்பிய மக்களும் ஐதராபாத்தில் இவருக்கு மிக உற்சாகமாக வரவேற்பெல்லாம் அளித்தார்கள். கடைசியில் ஐதராபாத் வந்து சேர்ந்தவுடன் இந்த ''தெலங்கானா கொண்டான்'' - ''மக்கள் ஒற்றுமை கொன்றான் '' கே.சந்திரசேகர ராவ் காங்கிரஸ் கட்சியுடன் தனது கட்சியை இணைக்கும் பேச்சுக்கே இடமில்லை என்று திட்டவட்டமாக தெரிவித்தது என்பது ஊருக்கெல்லாம் அல்வா கொடுக்கும் காங்கிரஸ் கட்சிக்கே என்னால் தான் அல்வா கொடுக்க முடியும் என சந்திரசேகர ராவ் நிருபித்துக் காட்டியிருக்கிறார். வடை போச்சே என்ற கடுப்பில் காங்கிரஸ் கட்சி இப்போது இருக்கிறது.
எமனுக்கே எமனாக இருப்பார் போலிருக்குதே இந்த சந்திரசேகர ராவ்....?
1 கருத்து:
அய்யா, தயவு செய்து தெலங்கானாவின் சரித்திரம் தெரிந்து எழுதுங்கள். தெலங்கானா மக்களின் விருப்பமில்லாமல் தான் பழைய ஆந்திர மாநிலத்தோடு (கர்நூலைத் தலைநகராகக் கொண்டு சென்னையிலிருந்து பிரித்தெடுக்கப்பட்ட மாவட்டங்களை உள்ளடக்கியது) சேர்த்து ஆந்திரப் பிரதேசம் என்று மாற்றிக் கொண்டனர். மாநிலம் உருவான நாளிலிருந்தே அவர்கள் போராடி வருகிறார்கள். இதில் அரசியல் அமைப்பு சட்டம் எங்கே காலில் போட்டு மிதிக்கப்பட்டது? இது மாநிலத்தைப் பிரிப்பது அல்ல, பழைய நிலையில் மீண்டும் கொண்டு வருவது. அதனால் தான் மாநில மறுசீராய்வு என்று சொல்லுகிறார்கள். Bifurcation என்று எந்த இடத்திலும் சொல்லப்படவில்லை.
ஒன்றுபட்ட ஆந்திரத்தை விரும்பும் மக்களின் கருத்துக்களை மதிக்கவில்லை என்று சொல்லுகிறீர்கள். அப்படி என்றால் தெலங்கானா மக்களின் கருத்துக்களுக்கு என்ன மரியாதை?
உங்கள் இடுகையில் மக்களில் யாருக்குமே தெலங்கானா அமைவதில் விருப்பம் இல்லாதது போலவும் கே.சி.ஆர். ஒருவர் மட்டும் பிடிவாதம் பிடித்து தெலங்கானாவை அமைத்தது போல எழுதியிருக்கிறீர்கள். உண்மையில் கே.சி.ஆர். கட்சி ஆரம்பிப்பதற்கு முன்பும் அதே கோரிக்கையை வலியுறுத்திப் போராட்டங்கள் நடந்து கொண்டு தான் இருந்தது. தமிழகத்தின் முன்னாள் ஆளுனர் சென்னா ரெட்டியும் இதே போராட்டத்தை முன்னெடுத்தவர் தான். அவருக்கு முதலமைச்சர் பதவி கொடுத்து போராட்டத்தை நீர்க்கச் செய்தது காங்கிரஸ் கட்சி.
ஒரு பதிவை எழுதுவதற்கு முன்பு கொஞ்சமாவது அதைக் குறித்து ஹோம் ஒர்க் செய்துவிட்டு எழுதுங்கள். எடுத்தோம் கவிழ்த்தோம்னு எழுதாதீங்க. உங்கள் கட்சியின் நிலைப்பாடுகளை உங்கள் எழுத்தில் பிரதிபலிக்க விரும்புவது தவறில்லை தான். அதற்காக உண்மை என்று ஒன்று இருப்பதை சுத்தமாக மறந்துவிடுவது அத்தனை சரியல்ல.
கருத்துரையிடுக